【壁畫打卡行】

放假除左行街睇戲食飯，仲想同朋友一齊搵其他娛樂？ 不如就嚟一趟壁畫尋找之旅啦！
1. 紅磡海洋風樓梯壁畫
地址：紅磡道佛光街天橋兩旁、紅磡道黃埔花園
位於紅磡嘅呢幅壁畫，係以熱帶海洋為主題嘅樓梯壁畫，壁畫上畫滿左唔同嘅熱帶魚同海龜，
似足置身深海世界一樣！係炎炎夏日中都感受到一絲涼意～

2. 西營盤異國風情壁畫
地址：奇靈里、石棧里及忠正街
全新藝術小區「藝里坊 ARTLANE」喺上年開始已經有好多藝術壁畫展出，最近又有13幅以維也納異國風情街道小鎮為主題嘅壁畫展出。
有河畔小徑同特式小店壁畫，仲有紐約、倫敦、首爾等世界各地風景，更有荷里活名人嘅壁畫, 簡直充滿異國風貌！
鍾意鮮豔色彩嘅朋友，仲可以到隔離嘅彩虹樓梯同動物小鎮影相！

3. 荃灣壁畫村
地址：荃灣光板田村二段
呢條壁畫村入面嘅壁畫大部分係由義工小朋友畫嘅，所以畫風可愛又充滿童真！
入到呢條村，就好似入左一個童話世界，四周圍都係色彩繽紛嘅建築，有蘑菇小屋、動物樂園同繽紛樓梯！
鍾意可愛風嘅朋友記得唔好錯過呀！