俾個目標自己！

如果想進步嘅話，最好就係每一年嘅年頭都為自己設立來年嘅目標！但係好多人都係「講就天下無敵，做就無能為力」，一年過去發現自己好似咩都冇做過，年頭訂立嘅目標到咗年尾變成一個笑話😭2020年發生咗太多事，因為疫情嘅關係，大部份人嘅生活有翻天覆地嘅轉變，相信令到好多同學都無所適從。踏入2021年，俾一個新嘅目標自己，令自己有動力同有方向係好重要㗎！

喺疫情反覆同實施社交隔離嘅情況下，好容易因為自制力不足而迷失自我—經常留喺屋企好自然就會想hea，亦都冇動力做嘢！所以趁着新年去設立一個目標來提升自己啦！

無論係想追GPA、想學一個新技能、新語言、培養一個新習慣等等都可以成為你嘅新年目標～

但講就容易，實踐好難🤯要堅持完成一個目標唔放棄足足一整年係一件唔容易嘅事。下面嘅小技巧可以令更輕鬆去實現你嘅願望！

– 先定立一個實際而且明確嘅小目標

一開始訂立模糊嘅目標，只會令自己慢慢失去動力。例如：健康減肥唔反彈😳一個太籠統嘅目標令自己冇方向

你可以試吓從啲小目標開始，分階段咁樣達成你最終一年入邊嘅大目標。例如你可以先培養運動習慣，再設立一啲輕鬆完成嘅小目標令自己可以達成「培養運動習慣」呢個階段！

例如：每日堅持行10000步/喺屋企做15分鐘運動，之後逐漸增加難度，直至你習慣每日運動～完成呢個階段性嘅目標就可以逐漸向最終目標進發喇！

好喇！依家先拎起枝筆計劃一下2021要實現啲咩目標啦～