原來《Frozen》的名字背後 暗藏迪士尼創辦人傳說？

聽到《Frozen》，或者好多人會先諗到Elsa、Anna同Olaf 嘅故事，同埋洗腦歌《Let it Go》、《Into the Unknown》，但其實網絡一直流傳咗個關於《Frozen》同迪士尼創辦人被冷藏遺體嘅傳說，你又信唔信呢？

創辦迪士尼嘅Walt Disney喺1966年因為肺癌逝世，但因為Walt Disney非常重視私隱，所以無公佈太多關於佢遺體嘅處理細節。然而，網上一直有傳Walt Disney嘅遺體並無經火化處理，而只係冰封咗，等待有朝一日科學家擁有相關技術可以將佢復活，好多網民同迪士尼粉絲都一直深信呢個說法，有啲仲話Walt Disney嘅遺體就安放喺美國迪士尼嘅「加勒比海盜遊樂區」。

因為有傳嘅冷藏遺體方法，每當網民搜尋「Walt Disney」、「Frozen」呢啲字眼時，就會彈出好多唔同嘅相關資料，所以有指迪士尼推出《魔雪奇緣》呢套卡通時，特登命名為《Frozen》，希望籍此洗得走網絡上嘅言論，網民之後再搜尋「Frozen」嘅時候，只會搜尋到有關卡通嘅資料。

不過，關於Walt Disney議題嘅陰謀論，其實迪士尼同埋Walt Disney女兒都否認過，但隨著《Frozen2》上映，呢個說法又再次被帶出嚟討論。你又信唔信網民的嘅說法？