唔想錯過Reg Day！大學新鮮人要好好準備Reg Day 啦！

Reg Day可以話係各位DSE畢業生見識U Life嘅一大盛事，Reg Day簡單啲黎講就係新生註冊日！但係唔好以為Reg Day就係單純地報到，攞張學生證就完。其實呢一日十分重要，唔想錯過呢一日就要好好準備啦~

1.帶足現金

Reg Day除咗報到，你亦會經過學生會、Faculty同埋各大興趣學會嘅Booth，佢地會叫你入會或者係參加Ocamp，如果一早有玩幾個Ocamp識多啲人嘅意慾，就一定要帶多啲現金報名啦。

2.悉心打扮

有部分大嘅學會會安排新生喺Reg Day影相，而學生證上面嘅相通常都係當日影，所以務必悉心打扮，當然女孩子切忌妝容太重，潮流妝容年年在變，之後睇翻學生證後悔就唔好啦！

3.入學會做會員要諗清楚

Reg Day係你地大日子之餘，其實都係各Soc(學會)嘅大日子，佢地會希望吸納多啲會員，然後賺取學會營運資金，當日你可能會面臨各Soc嘅熱情招攬同講解，但係要注意自己係咪真係有咁多時間參與活動，係咪真係對該學會有興趣？學會風氣係點等等，不過都有學會係福利多過活動，大家經過Booth時候唔好慌張，慢慢聽講解，諗清楚再入會就可以啦。

4.Keep住有用嘅leaflet

當日唔同嘅Soc、hall都會派好多宣傳單張俾你，可能嗰日你會覺得好麻煩，會好似平時咁將啲Leaflet掉咗佢，但係呢啲Leaflet係師兄姐們嘅心血，當中有啲資料都好有用，例如會介紹Reg科、Reg Hall，上莊，學會活動，Exchange等等，慢慢睇完，俾自己對入U有一定嘅基礎概念！

5.選擇Ocamp

去Reg Day前可以諗下自己會想去咩Ocamp，個人認為Faculty嘅Ocamp一定要去，因為可以識到第一批經常上堂會見到嘅同學，可以唔洗驚之後識唔到人一齊做Group Project！而Hall嘅Ocamp都係十分有意義，可以幫你提早認識Hall Life同識到同層以外嘅其他朋友！比較Yo嘅朋友仔就可以考慮大O(學生會主辦)，因為可以識到唔同Faculty嘅人，興趣學會嘅Ocamp有啲會同其他大學一齊舉辦，當中更有機會認識其他大學嘅人~所以揀Ocamp一定要貼合自己所需！

6.心態準備

有啲Freshmen(即係即將Year1的人) 可能會好怕醜，同埋遇到Hall嘅宣傳區，見到唔同Hall嘅師兄姐蜂擁而上，好似搶客咁，會令到你即刻嚇到走佬，但係其實只要相信佢地冇惡意，冷靜對待即可！

希望呢啲資訊對大家行Reg Day有用啦！