大學生要知！ 信貸評級對你日後有幾重要？

有唔少人認為，唔賭唔投資唔創業，借貸距離自己十分遠。但係，其實「信貸評級」離你並唔遠，當你由18歲開始申請第一張信用卡開始，信貸記錄就一直累積緊！到你日後有機會用貸款服務嘅時候，信貸評級就係有機會影響你審批款項嘅準則之一！所以作為大學生，要認識信貸評級概念，為日後做打算！

.

1.信貸評級嘅應用層面廣泛

信貸評級嘅應用層面十分廣泛，小至申請一張新嘅信用卡，大至做融資或者樓宇按歇都需要參考信貸評級報告，如果你由擁有第一張信用卡開始理財不當，導致信貸評級不佳，之後就算想問銀行借錢俾首期，或者係做生意想借貸以現金周轉，就有可能被拒絕借貸！

.

2.信貸評級需好好維持

信貸評級就好似同另一半拍拖一樣，需要好好去維繫同佢之間嘅感情，定時定候送下禮物。信貸評級機構會按照你過往嘅信貸記錄同最近嘅借貸行為做比較，然後調整評級。例如，你某個月唔記得找卡數，就可能令信貸評級下降，萬一情況持續，賬務越滾越大，又還唔清，信貸評級或者會暴跌。要拯救信貸評級，就要在之後嘅一段長時間內保持良好嘅信貸記錄，例如準時還款，減少借貸金額同次數等，簡單啲黎講，好似氹翻個女朋友博翻佢對你嘅信任咁，評級就會慢慢回升。

.

3.防止信貸評級大幅下滑嘅方法

所以，由擁有信用卡開始就要做好理財習慣，記得準時還清卡數，最好設置還款提示或者自動轉賬，預防因為忙碌而唔記得找卡數，令評級下降。

先洗未來錢有一定嘅風險，如果明知無能力償還，就停手。萬萬不能卡衾卡！

.

4.信貸評級小知識

信貸評級共分為10級，A級為最好，J級為最差。影響信貸評級升降嘅因素有還款記錄、信貸額、信貸組合同賬戶資料等，在申請貸款之前，好多銀行或金融服務公司都會參考申請人嘅信貸評級決定會唔會批核申請。

.

所以，同學仔要養成良好嘅理財習慣！維繫好自己嘅信貸評級！