大家嘅童年回憶零食，你有冇食過？

四方果

一個正方形嘅膠盒入面裝住五顏六色嘅啫喱。細細個嗰陣士多同超級市場都見到佢嘅身影，不過好可惜嘅係依家已經停咗產！

出奇蛋

出面有層蛋型嘅朱古力外殼，爆開佢就可以拎到入面嘅玩具出嚟玩。真係一次過滿足到細路仔嘅兩個願望！重點係佢個朱古力殼其實真係好好食㗎！可惜近年轉咗做奇趣蛋，出面嗰個朱古力蛋殼轉咗做膠殼，好似已經冇咗細個嗰種打開佢嘅樂趣。

媽咪麵

相信大家小學嘅時候都食過！要整碎包麵先打開佢落調味粉，再狂chok 包麵令啲麵同調味粉撈埋一齊。然後就會有好多同學伸隻伸埋嚟拎你啲麵！

唧唧冰

以前小學嘅小賣部有得買！通常都係兩個人開心share。買一枝冰然後將佢由中間分開，同朋友一人一半。夏天食超爽！

孖條

同唧唧冰一樣都係可以同朋友share 嚟食。不過就比唧唧冰貴啲。

戒指糖

可以將粒糖穿係手指度然後慢慢食！通常都係女仔先會買，因為佢個樣睇落似寶石，但味道就一般喇。

欣欣杯

細個覺得佢好fancy😂可能因為佢份量唔大又比其他零食貴。入面有啲長條型嘅餅乾，食嗰陣將啲餅乾點埋杯入邊嘅醬嚟食，都幾好食㗎！

大發鱈魚絲

細個以為佢係魷魚絲，同媽咪麵一樣，一打開就會引來周圍同學嘅手。

唔知大家有冇食過晒依幾款零食呢？！好懷念細個小息衝去買零食嘅時光呀！