情人節懶人包—約會地點及禮物攻略

又到一年一度嘅情人節，究竟可以去邊放閃sweet下呢？ 以下就有4個地方可以同另一半喺情人節嘅時候去約會放下閃喇~

1.下白泥睇日落🌅

「日出鳳凰，夕照白泥」，喺遠離煩囂嘅郊外同另一半睇住日落，靜靜共度兩個人相處嘅時光，身心靈都得到平靜。而運氣好嘅話仲會睇到好靚嘅彩霞同「天空之鏡」！！浪漫之餘仲喺一個好好嘅打卡哋點，記住要影張靚相先好走啊！

2.山頂花園🏔

山頂公園係以前港督別墅嘅「後花園」，擁有古色古香嘅維多利亞式風格建築，每年都吸引到唔少情侶嚟朝聖打卡。園內有一大片草地，鳥語花香，日頭喺呢片草地一邊傾偈一邊野餐，到咗夜晚就可以觀星賞月，係咪好浪漫呢！去山頂公園之前可以順便坐山頂纜車，沿路嘅風景都好靚㗎！

3.南豐紗廠🖼

作為荃灣區嘅最新好去處，獨特嘅建築設計同具藝術感嘅壁畫吸引咗唔少文青喺到聚腳打卡，亦都成為情侶拍拖嘅新景點！南豐紗廠保留咗舊式工廠嘅部份外貌，但內部設計一啲都唔老土，唔同風格嘅裝修成為咗好多嘅打卡靚位，絕對係訓練男朋友影相技術嘅好場所🤣 南豐紗廠亦有多間cafe、手作精品店進駐，喺打卡嘅同時仲可以喺呢到享受悠閒舒適嘅文青約會！

4.愉景灣🏖

愉景灣距離市區都唔算遠，生活節奏輕鬆，沿岸有大白灣沙灘、多間唔同菜系嘅外國餐廳，無論係日頭抑或夜晚，景色都非常之靚，可以輕鬆咁享受異國風情！而喺愉景灣嘅愉景北商場同愉景廣場，就會舉行「Love Is All Around」活動，會喺情人節期間打造超浪漫嘅主題畀大家去打卡，分別有海濱嘅心鎖長廊、浪漫嘅小黃燈天幕等等，最好就係喺夜晚嘅時候去，因為喺燈光嘅襯托下會更顯浪漫溫馨！

其實拍拖都唔一定要洗好多錢，行下草地睇下靚景，重要嘅唔係去邊，而係同邊個一齊去。禮物方面：

送畀男朋友嘅禮物：

1.PS5

呢個絕絕絕絕絕對係每個男仔嘅夢想，如果女朋友喺情人節送部PS5畀自己應該會即刻求婚🤣 成個2021一定好開心~ 不過會有一個風險就係男朋友會唔肯出街🤣

2.波衫

如果男朋友係一個球迷，就可以送上佢鍾意嘅球隊嘅波衫！不過買波衫之前係住問下佢啲兄弟男朋友係咪已經有嗰件波衫，同埋係想要「主場」定「作客」、「落場版」定「球迷版」仲要知道男朋友最鍾意邊個球員，咁畀心機男朋友收到一定好開心！

3.親手整嘅蛋糕/朱古力

呢款禮物就比較適合啱啱一齊冇耐嘅情侶，因為情人節送朱古力好經典，但正正係因為經典先突顯對方係幾咁特別！

送畀女朋友嘅禮物：

1.香水

可以參加工作坊整一個屬於彼此嘅味道，每次聞到呢個味就會諗起對方，而女仔日日都會用香水，所以送香水唔會驚唔實用嘅同時又浪漫！

2.銀器飾物

送貼身飾物就好似自己一直陪住對方，尤其係自製情侶戒指或者手鐲，將對方嘅名刻喺上面，成為專屬對方嘅飾物，獨一無二。

3.DIY相冊/卡

將大家嘅點點滴滴用相+文字整成一本相冊/卡，可以寫低一啲平時唔好意思開口嘅說話，一定冧死女朋友~

禮物美好嘅地方唔在於紀念節日，而貴重與否亦都唔代表感情嘅深淺，禮物係畀彼此一份睇得到嘅回憶。不過其實有時一直陪住對方就已經係最好嘅禮物，希望大家都有一個溫暖開心嘅情人節~