戴口罩戴到生痘痘？
出街一定要戴口罩，但戴耐咗又容易生痘痘，究竟可以點改善同避免？
- 使用清爽易吸收嘅日間護膚品
喺戴口罩前，盡量唔好用過度滋潤嘅護膚品 ，因為喺肌膚無法完全吸收嘅狀態下用口罩焗住塊面，容易令肌膚負擔過大，而造成毛孔粗大或粉刺痘痘問題。日間改用較為清爽嘅護膚品同防曬， 而且確保喺完全吸收後先再戴口罩咁就唔會令肌膚易出問題。
如果要化妝嘅話，建議可以用粉餅類嘅化妝品，代替液體狀嘅化妝品，比較清爽透氣嘅化妝品可以降低爆痘嘅機會。
- 注意水油平衡
無論係唔係油性肌膚，如果喺水油唔平衡嘅狀態下，又成日戴住口罩焗住就會好容易令肌膚出油甚至生痘痘。
所以保養時特別要注意水油平衡， 油肌可以用控油護膚品嚟改善出油問題，乾肌除咗用乳液、乳霜之外，仲可以配搭面膜或者保濕精華嚟調整膚質，令肌膚唔致於因缺水而過度出油。
- 晚間徹底清潔肌膚
每日翻到屋企除左口罩之後記得要即刻清潔洗面，有啲人可能因為戴咗口罩冇化妝，清潔嘅時候就冇咁仔細，搽咗防曬都冇卸妝。
如果所謂「冇化妝」，喺連隔離霜、防曬都冇用嘅話，的確可以只用普通潔面產品清潔。 但如果有搽隔離霜、防曬，就要用到卸妝產品啦。咁先唔會令呢啲產品同空氣中嘅灰塵結合物喺面上殘留。
- 晚間搭配使用酸類保養品
因為戴口罩會焗住塊面一整日，肌膚特別容易生粉刺同痘痘，尤其喺鼻哥同下巴嘅位置。
如果有毛孔同粉刺困擾，喺夜間保養嘅時候可以搭配酸類護膚品使用，嚟幫助肌膚代謝，唔單止可以改善毛孔問題，亦可以改善因成日俾口罩焗住而生粉刺同痘痘嘅問題。