暑假嚟到！介紹5個網站俾仲未搵到Part time嘅你~

以前搵工，多數人都會去勞工處網站度搵，但係針對Part time, Freelance等等工作近年亦有針對性嘅搵工網。嚟到暑假，唔少學生都會趁假期賺翻啲錢，用自己錢做自己想做嘅事~以下向大家介紹5個熱門嘅Part Time求職網站啦！(排名不分先後)

.

推介一：JobsDB

JobsDB係全港第一大嘅搵工網Job Search Engine，除咗有工種齊全嘅全職之外，亦有唔少Part Time工作喺呢個網度發布，由於好多人都選擇喺JobsDB度搵工，所以求職者都大部分喺網站上建立自己嘅CV，好處係減少咗製作CV嘅時間。喺JobsDB上面，你會見到比較多熟悉嘅品牌名，呢個亦係其缺點之一，因為工種性質上比較專業，例如瑜伽導師、客戶服務、媒體編輯等，變相門攬較高，以及招聘時間比較長，僱主可能會慢慢揀，揀到啱為止，如果你急住開飯，JobsDB未必可以幫你解決燃眉之急。

.

推介二：香港兼職網Part Time

呢個網站專門發布兼職、臨時工、短期合約工作等等，所以適合暑假搵工嘅學生哥，而且香港兼職網Part Time嘅工作項目更新速度快，經常有新嘅職位空缺，而且種類廣泛，要求門檻唔會好高，但可能薪金就相對少，不過都係搵Part Time嘅不二之選！

.

推介三：HK Slash

HK Slash屬於 Part Time工種性質豐富嘅搵工網站，有Freelance、兼職、臨時工、炒散等對於急需搵工嘅失業人士非常有用，有人對炒散觀念通常都係餐廳，但係有啲炒散，例如興趣班導師、Marketing Assistant、超市推廣員等，入職門檻十分低，好容易就會請你，急住搵工嘅你不妨上去留意下！

.

推介四：HK Good Jobs

HK Good Jobs最特別嘅係工作範圍好大，除咗一般服務業同商界嘅Part Time之外，亦有唔少政府外判嘅臨時職位，通常需要大量人手，而且入職門檻低，基本上做到「見工就請」，呢啲外判翻工時間同工作量都好穩定！同埋通常政府嘅兼職都比較高人工~

.

推介五：Indeed.hk

Indeed係屬於全球第一求職網，其特色係有網友匿名提供嘅企業評價參考，提供嘅搜索引擎形同搵工版本嘅Google，可以運用各種條件篩選自己想要嘅工，但係亦因為搜索引擎太強，唔係太容易上手，網站亦唔會主動推薦職位空缺。

.

介紹完5個搵工網之後，其實坊間都有其他搵工網，例如CTgoodjobs，炒散王，仲有Facebook嘅搵工群組，WhatsApp嘅炒散Group等等，只要努力啲搵工，一定會搵到嘅！