有咩方法可以令自己唔好亂咁洗錢？

你係咪有時會懷疑自己係咪中咗「花錢如流水」呢個魔咒？明明用盡各種方法再三告誡自己呢個月要慳錢，但係永遠都係會唔小心去咗食大餐、唔小心買咗新衫新鞋新化妝品…做唔到自己嘅期望真係會對自己失望。要避免做月光族，令自己唔好亂咁洗錢，就要先從呢三個方法落手，守住自己嘅荷包！

1. 訂出上限

根據收入嚟訂立預算係好重要嘅事，但係唔係就咁訂一個數字就算，之後嗰幾個月要好好追蹤自己嘅花費情況，先至會知道自己超支嘅兇手係咩，然後克服佢。所以喺設定每月預算嘅時後，一定要對自己容易失手洗太多錢嘅種類訂立一個明確嘅數字，例如你好鍾意買鞋，咁就可以為「買鞋」訂立一個明確嘅金額上限，咁樣一定可以幫你達到每個月嘅目標！

2. 分享你嘅目標

無論係同信賴嘅親朋好友分享，抑或係po story昭告天下，令其他人知道你想要好好咁理財、洗少啲錢。選擇用社交媒體分享，一定會有好多人可以督促自己。所以當下次你嘅預算已經唔係好夠，但仲想要去食大餐嘅時後，自然就會諗到社交媒體裡面嘅人。無論成敗都喺網絡上面分享，可以增加自己嘅責任感，加強達成目標嘅動力。

3. 遠離誘惑

想要洗少啲錢，可以試下取消訂閱你最鍾意嘅品牌。即使以後想再睇返都可以再訂閱多次或者去官網上面睇，而而家咁樣做，至少可以避免排山倒海嘅促銷信息湧入你嘅email。因為網路購物真係太方便，一唔覺意就會洗大咗。

其實「控制洗費」同做其他任何事嘅原則都係一樣嘅：設定目標之後全力以赴。

相信只要保持住呢個態度，任何目標都可以達成！相信大家可以脫離月光族！