清潔隨身物品六部曲！

武漢肺炎疫情持續，除左勤洗手同戴口罩之外，其實有無諗過你地嘅隨身物品上嘅細菌同病毒可能會超晒標呢？例如眼鏡同手機等等，英國手機保險公司 (Insurane2go) 喺2018年嘅研究指出指原來手機屏幕上面嘅細菌仲可能比馬桶多出3.5倍添㗎！所以千奇唔好掉以輕心，清潔隨身物品都係抗疫必做之一！

港大醫學院內科學系臨床教授孔繁毅都有教教大家點棣清潔以下六樣隨身物品！

第一，眼鏡。喺洗緊手時可以順便洗埋眼鏡，用雙手搓梘液最少20秒鐘，然後將搓出嚟嘅泡泡均勻抹喺眼鏡度，記得大大小小嘅角落都要㗎！再用水徹底沖乾淨就得啦～

第二，手機。可以將少量酒精搓手液唧喺紙巾或者眼鏡布上，再仔細抹下手機屏幕，鏡頭同埋Phone Case，記住連幾粒制都唔好放過阿！或者可以用消毒濕紙巾抹乾淨成部手機，再用乾紙巾或者乾布抹乾，咁就唔會又有水痕又夠乾淨啦！

第三，外套。可以就咁用浸咗清水嘅濕布簡單抹下外套又或者一塊濕布放喺外套上面，再用熨斗熨一熨，咁就可以用高溫嚟殺菌。如果陽光普照，仲可以曬下太陽殺菌。不過唔好唔記得，出完街番屋企要用酒精噴下件外套～

第四，衣物。如果長時間暴露喺多菌嘅空氣度，例如：診所、醫院、學校等呢啲高危地區，底衫褲沾染到細菌病毒嘅機會雖然唔大，但都要記住每日清洗！

第五，手袋。可以簡單用浸過清水嘅濕布抹乾淨！如果手袋材質許可，仲可以噴下酒精㗎～

第六，鞋。記住入屋前除鞋，再噴啲消毒火酒喺鞋底，或者可以將鞋拎入屋後用番梘同清水洗洗鞋底；當然仲可以喺門口放一條浸過1:99稀釋漂白水嘅毛巾，入屋前踩下條毛巾消毒殺菌！

講到底，抗疫係要講求大家自律，同埋點少得保持身體健康呢！