父親節送咩好

上個月先過完母親節,今個月21號又到父親節啦!父親節都一樣要花啲花思,準備驚喜俾爸爸,廢事爸爸呷媽媽醋啦😂~今次整理咗幾份實用又高質嘅禮物俾大家參考下。

 

  1. 紅酒🍷

好多爸爸都好有品味,有品酒或收藏酒嘅嗜好,不妨同爸爸了解下佢鍾意嘅紅酒或者其他酒嘅類型,買返支同佢淺酌下,傾下心事,跟佢學下品酒,拉近關係啦。

 

  1. 鋼筆🖋

如果爸爸從事文職,經常要用到筆去寫字工作嘅話,鋼筆絕對係最好嘅父親節禮物!買返支高貴好用又寫得順嘅鋼筆送俾爸爸,每日代你陪住佢工作,都好窩心㗎~

 

  1. 銀包👝

爸爸努力搵錢養家,緊係要有個靚靚銀包,幫爸爸管理好啲錢啦~呢個都係個經典、大家最常送嘅父親節禮物嚟。

 

  1. 剃鬚刨🪒

剃鬚刨係男人嘅生活必需品,就算爸爸係留鬚都好,剃鬚刨都可以幫佢做唔同鬍鬚造型!唔留鬚嘅爸爸更加需要一個好用嘅剃鬚刨,最緊要用得順暢、剃得乾淨,快啲去買個剃得舒服啲剃鬚刨俾爸爸啦!

 

  1. 一餐豐富嘅晚餐🍲

好多爸爸講求實際,禮物可以唔洗花錢買,食得飽先最重要!有時佢會想你慳返啲錢,有同佢慶祝嘅心意就夠㗎啦~去book間好食嘅餐廳,又或者親自下廚填飽爸爸個肚,佢都已經會好滿足,所以呢個都係最簡單直接嘅禮物選擇!