珍珠奶茶愛好者注意!唔止係肥咁簡單

近年台式飲品非常hit,出街實會見到有人手上拎住一杯珍珠奶茶。好飲係好飲,但最弊係對身體唔好!下面同大家一一拆解佢有咩成份啦~

 

珍珠:

佢由黑糖同木薯粉製成,本身已經高澱粉質同高卡路里。如果係黑糖珍珠嘅話會落更多糖去煮,令成杯嘢更甜!

 

奶:

除非你係嗌珍珠鮮奶,否則大部份台式飲品都係用奶精調製。總脂肪同反式脂肪含量好高,所以熱量都相對上高㗎!長期攝取過多反式脂肪會令血液中嘅壞膽固醇上升。除咗變肥之外,患上血管栓塞、心血管疾病同脂肪肝嘅風險亦都會增高!

 

另外,珍珠奶茶含有鞣酸和茶鹼,佢哋會阻礙鈣、鋅、鐵、鎂等礦物質嘅吸收,長期飲用有機會阻礙平常骨質流失的補充。仲有珍珠難消化同埋奶茶入面嘅咖啡因可能會影響睡眠質素就唔多講喇。

 

飲一杯珍珠奶茶要跑超過一個鐘頭先可以完全消耗佢嘅所帶嚟熱量,小心無形之間就變咗個肥仔呀!