疫情之下 大學Freshman的5大困擾！

香港第三波疫情爆發，近住大學開學日，好多原定嘅計劃都遭受到變動！對於一眾新生，或者都要面臨種種嘅困擾，細數疫情下Freshman嘅5大困擾！

.

1.Reg Day變online模式

由於限聚令緣故，有大學將Reg Day即新生註冊日改成網上進行，由原本可以到Faculty、唔同學會、Hall等感受一下大學嘅U Life，享受一眾師兄姐喺Red Day當你係寶寶咁推介唔同嘅大學活動，變成會喺網上自己閱覽各學會Facebook Page、IG或者網頁等，好似樣樣真係靠自己，揀咩學會同Hall都變得好困擾……

.

2.Ocamp延遲或取消

本來Ocamp就係Freshman認識第一批大學朋友嘅途徑，但喺疫情之下，好多學校都要求Ocamp延遲舉行或者直接取消，相信唔少對大學生活有一定嚮往嘅Freshman都會想象一下自己Ocamp要有咩形象、要參加一個點嘅Ocamp，而Ocamp取消一定係好多人嘅噩耗。

.

3.失去寶貴Hall Life

疫情之下，相信有唔少家長都會擔心仔女住hall人多，擔心會造成疫情爆發嘅溫床，所以拒絕呢一年俾Freshman住Hall，而喺Hall裡面Year 1往往係最多人照顧同錫嘅年記，係最能夠體會Hall Life嘅一年，如果因此唔住或者因為疫情少咗好多Hall Function，喺體驗Hall Life上一定會有好大損失！

.

4.失去Reu、飲酒等體驗

好多人都會覺得喺大學裡面就係要玩盡佢，以往大學組爸媽或者層父母都會舉行Reu (聚會)，令到同學之間關係更加融洽，好多時候大學嘅生活可以稱得上「熱血」得嚟又夠「糜爛」，會不時約酒局，一齊玩酒game，加強感情聯繫。但係疫情之下，限聚令以及衛生問題，相信呢啲活動會少之又少，呢一年可能就無法體驗

.

5.zoom上堂失去樂趣

第一波疫情爆發時候，停學時期都會用Zoom上堂，對於Freshman而言冇得體驗下上完一堂，去第二個課室見另一批新面孔，搵陌生同學一齊組隊做Project等經歷~淨係對住部電腦上堂，有時都會覺得好悶同好掛住課堂生活。

.

呢兩年嘅同學仔都係被選中嘅小孩，面對住種種意想不到嘅變動，希望大家都保持身體健康！之後先有機會重新體驗大學生涯。