股票冷知識 (二)

你對於股票投資嘅認識有幾深?咩係五窮六絕七翻身 🗓️,你又知唔知?

 

上世紀八十年代起,香港有一個都市傳聞:五窮六絕七翻身,據說呢個係從多年本港股市跌市嘅時候觀察得出嘅結論。就係每年五月開始跌市,到咗六月會大跌,一路直到七月先會回升,但其實出現呢個現象都係因為本港大多數嘅公司會喺三月公布年結業績,除息除權之後,股價下跌亦都不足為奇,而美國股市亦有同類理論:「sell in May and go away」。呢句古老嘅華爾街投資格言,係源於當時投資者會喺五月前拋售手頭上嘅股票,然後喺十一月再入市。

而背後原因眾說紛紜,有啲人話係因為西方五月至十月期間有暑假,市場活躍度較低,而十一月至四月就適逢年結,基金會粉飾櫥窗,加上打工一族年底會派發花紅,刺激資金入市,從而帶旺投資氣氛。雖然呢個講法已廣泛流傳,但其實金融市場環環相扣,外匯市場、商品市場、各地政經因素同政策等都會影響唔同地區嘅股市表現,以至大市走勢,所以喺投資前要留意相關新聞並作多方嘅考慮。 

 

以上嘅資料都只供參考,同學係投資之前一定要做足功課先好呀~