脫離中學 大學新鮮人最唔習慣嘅五大轉變！

脫離中學 大學新鮮人最唔習慣嘅五大轉變！

即將進入大學嘅莘莘學子，無論你係讀大專定副學士，你都必然會經歷脫離中學之後好唔習慣嘅轉變，為免帶住擔憂入U，你首先要做好心理準備，應對以下五大轉變！

1.Reg科

好多時中學生可能連reg科係咩意思都未知，reg科即係揀course，同學仔要注意自己修讀嘅major畢業要求係啲乜，例如要讀幾個credit嘅general course，幾個credit嘅major course，幾個credit嘅elective等，睇清楚之後先開始閱覽有咩course自己有興趣，然後自己安排個時間表，會唔會安排個day off俾自己等等，reg科實在有太多學問，好似要避免揀嘅科撞時間，唔好揀中Killer (GPA 殺手)嘅堂，大學嘅課堂唔再好似中學一樣全部由學校安排，而係靠自己自律選擇，所以最好問下師兄姐應該點reg科最穩陣！

2. 冇固定一班同學

成日都聽中學老師講，中學最難能可貴嘅就係同班同學，上到大學已經唔會再有一班固定嘅同學上堂，除咗Major堂會撞翻一部分同學，但之後上elective就要重新適應其他科嘅同學，你會有機會接觸唔同嘅人，有機會每次都要厚住面皮咁問有冇人一齊同組做project，入到大學就要學識點行前一步認識多啲新朋友，正所謂，識人好過識字。

3. 同老師嘅關係

喺中學嘅時候，老師都會當你係佢嘅仔女一樣，所以到高form會同老師好似朋友咁相處，但係到大學，同Professor嘅關係就未必好似以前咁親密，多數同老師嘅交流都係透過email，或者係落堂問下嘢，雖然大學都會認識到部分好好嘅professor，但就未必有中學日見夜見嘅感情。

4. 冇固定課室

同冇固定嘅同學一樣，中學會有自己嘅課室，坐足一年都會有感情，而大學通常一落堂就要起行去下一個課室，有時候分分鐘會唔識路去課室或者大頭蝦去錯課室，所以大家都要留意啦~

5. 交功課流程

以前交功課會有科長、班長提醒，負責收功課，前一日老師會提你交功課，確保你唔會漏做功課；而喺大學，可能第一堂就會講曬一個學期嘅功課，Professor未必會提你幾時交功課，同埋有啲功課都未必一日時間可以完成，如果唔上心嘅同學分分鐘會漏做功課，所以最好就mark好日程，知道幾時係邊樣功課嘅Deadline啦~

.

上到大學，好多時候都唔會有人提你、督促你、唔會當你係溫室入面嘅花兒，好多事情都要靠自己摸索，主動去問人，唔同環境都會有唔同挑戰，但係咁先會有所成長~加油！