超有質感野餐小道具 文青女孩必備日系Starbucks「迷你咖啡箱」！

最近見到唔少人都遠離城市，去到郊外野餐！野餐唔想飲紙包飲品咁悶？如果你係一個咖啡控又係行文青系路線嘅話，你就唔可以錯過日本Starbucks最近新推出嘅「Coffee Traveler」咖啡機，外形超有質感~帶埋佢去野餐打卡就啱曬~

「Coffee Traveler」係一個用紙皮箱造成嘅盒子，貫徹Starbucks簡潔嘅風格，就好似Starbucks嘅隔熱墊都係用紙皮造架，感覺超級文青。

呢個咖啡箱最得意嘅位係佢嘅設計，具有飲水機嘅開關口，方便斟落隻杯度，開關設計仲附有小蓋子，唔飲嘅時候可以直接封實，防止滴漏。除咗可以保溫之外，都防止郊外嘅灰塵吹咗入去，設計考慮得十分周到。

「Coffee Traveler」一共可以斟到12杯小杯分量嘅咖啡，另外加上奶，你就可以喺郊外做個咖啡師！真係超有感覺~

除此之外，「Coffee Traveler」仲好方便帶出街，喺咖啡機底部設有手挽，等你方便攞住行，同時仲增設一個可伸縮嘅底座，收納方便！

依家買「Coffee Traveler」仲附送12杯短尺寸紙杯、餐巾、糖、攪拌棒等，而且咖啡機可以循環再用！日本售價為¥2,700（約hk$196），不過依家只得日本Starbucks推出，如果大家有機會可以去日本買嚟當手信啦！