超經典回顧！90後女生必定玩過嘅10款經典線上遊戲~

疫情期間，留喺屋企無嘢好做，除咗煲劇、做運動、研究食譜等等，另外一樣最佳嘅消閒活動莫過於玩遊戲。大家成日都話女仔唔鐘意打機，但係其實大家一定忘記咗曾經嘅你係幾咁沉迷線上遊戲~除咗動物森友會，大家都不妨點開線上遊戲「過下手癮」，重拾翻童年嘅回憶！我地一齊黎回顧下有啲咩經典線上遊戲啦！

.

1.快速化妝約會

對於呢個遊戲最印象深刻嘅位係呢個男朋友成日都發脾氣，可能因為小編廢，細細個又好貪靚，成日都想試下化妝，呢個遊戲就好似滿足曬小女孩嘅慾望咁。我地要根據遊戲提供嘅妝容（大約只提供5秒參考）作指標，然後趕喺男朋友發脾氣前完成化妝，趕上約會嘅時間！

遊戲網站：https://www.qqschool.com.tw/game/1mm/mm035.htm

.

2.愛里做蛋糕

唔想洗錢買蛋糕材料，可以考慮下喺呢個遊戲入面鍛煉「身手」！玩過「愛里做蛋糕」嘅都知道由開始調配材料、焗蛋糕、裝飾等等，畫面十分逼真，好似真係落廚一樣，簡直係「Cooking Mama」嘅始祖~以前為咗追求「打爆機」，要整到個蛋糕完美先覺得滿足！

遊戲網站：http://www.i-gamer.net/play/14463.html

.

3.燒八爪魚丸

細細個好鐘意食章魚燒，所以好好奇章魚燒嘅做法~喺網上有好多章魚燒嘅遊戲，但係呢個係當中嘅經典！如果手腳慢啲，章魚燒都會燒燶晒，仲會扣咗唔少分數添！大家不妨試下！

遊戲網站：http://i-gameworld.com/games/ga405.php

.

4.香港茶餐廳

「茶記」係香港嘅特色，細細個無得入廚房，所以開茶餐廳係幾新穎嘅遊戲~個人認為呢個game有啲挑戰性，當越做越耐之後，客人舉手落單，樓面就開始手忙腳亂，十足十真正嘅茶餐廳，遊戲代入感好強！

遊戲網站：http://easygame.tw/g911.html?play=1

.

5.禁忌戀人

邊個少時冇好奇拍拖嘅感覺，禁忌戀人聽落去好似引人犯禁咁，實質上只係男女喺辦公室度偷錫。玩法就係，當老細轉頭聽電話嘅時候，用滑鼠撳住男女，佢地就會kiss kiss，一直撳到老細放低電話為止，如果比老細發現就即刻輸啦~呢個遊戲真係好刺激啊！

遊戲網站：https://www.i-gamer.net/site/1230.html

.

6.辦公室偷懶篇

平常喺辦公室成日想偷懶但又怕比阿頭捉到？呢隻經典嘅辦公室偷懶遊戲可以幫你完成平時唔敢做嘅事，遊戲入面係一位女職員，要趁恐怖阿姐唔注意嘅時候偷偷完成左邊清單入面嘅選項，小編依家玩翻都覺得刺激！

遊戲網站：https://www.i-gamer.net/play/1648.html

.

7.黃金礦工

呢個遊戲比較簡單，但係非常考大家眼力，要睇準啲黃金之後，然後㩒製採礦，唔同嘅礦石就有唔同嘅分數。

遊戲網站：http://www.i-gamer.net/play/875.html

.

8.燒牛肉

大家最初接觸到嘅日式燒肉遊戲~喺120秒入面盡自己最大嘅能力燒最多牛肉，一個唔覺意就會燒燶！所以記住要將牛肉不停反轉先得！

遊戲網站：http://www.asiadog.com/game/interest/4.shtm

.

9.敲鞋跟

呢個遊戲係要將鞋跟逐層打走，如果打嘅時間點唔啱，打到人隻腳或者兩層嘅中間，如果企唔穩就會輸，望落簡單，但係其實後面都會越黎越難！

遊戲網站：https://www.i-gamer.net/play/254.html

.

10.電眼美少女

電眼美少女簡直就係「收兵」界嘅典範，有邊個夠呢位美少女嘅「收兵大法」犀利？！玩家將操作美女或靚仔喺學校、車站、廟會等各個場景，搜尋目標然後用電擊，同時學識避開訓導主任、車長同其實競爭對手，否則就無辦法成功迷惑對方。

遊戲網站：https://www.i-gamer.net/site/1259.html

.

有咁多遊戲又點會怕悶，細細個留喺屋企玩成日都得！相信依家嘅你都得！！