駝背矯正帶？瑜珈？咩方法先係最有效改正駝背呢！

駝背不只影響儀態，長期姿勢不良，亦會造成肩頸痠痛。現代人日日玩手機，更加會加劇咗呢個問題，究竟咩方法先係最有效改善駝背問題？以下話俾你知啦！

1.駝背矯正帶

其實就係用兩條帶去強迫你一定要挺直，如果你唔肯挺直嘅話就會扯住你嘅身體，但係呢個方法其實係治標唔治本㗎，着嗰陣時就會有用，除低咗就冇用，而且因為相對嚟講使用感受會比較辛苦，條帶成日都會扯住自己，所以好多人都係帶咗一兩日就唔會再用㗎啦。

2.多注意自己嘅站姿同坐姿

如果發現自己係駝緊背，就即時改正，呢個方法係可以即時有用，不過就比較需要自己嘅自律啦，所以如果你係冇恆心嘅人，大概就只能夠維持幾分鐘， 過咗一陣唔記得咗就會即刻打回原型。

3.天鵝式瑜珈

能夠短時間內改善駝背問題，但係呢個亦都係一唔做就會冇效嘅方法，但由於強度較小，亦都有其他改善體態等作用，所以都推薦比體力較弱嘅女生做！

4.重訓練背

絕對係一個十分有用而且持續改善駝背嘅方法！當我們習慣性駝背時，表示肌肉張力失去平衡。咁可能係因為我哋嘅前側(胸部)肌肉太強、後側(背部)肌肉太弱，因此除咗要放鬆前側肌肉群，最緊要係加強已弱化嘅背側肌肉群，令我地前後肌肉張力達到平衡，至於訓練背肌嘅方法，大家可以喺YouTube上面就輕鬆search到大量教學影片啦！