2020實習位爭崩頭！面試衣著五大技巧！切勿誤踩雷區

好快又到咗實習嘅季節，最近一定都有唔少同學仔面臨Interview嘅關卡！面對疫情，好多實習都取消，一個實習位置變得難能可貴，而Interview往往就係俾人第一印象嘅時候！要留下一個好嘅第一印象，面試穿搭十分重要！既要大方得體，睇起嚟夠專業，亦要符合工作職位同公司文化，大家記住Bookmark以下5種重要嘅見工面試衣著穿搭技巧啦！

1.服裝顏色

啱嘅服裝可以傳達一種專業同自信，見工切記著大紅大紫呢類過於鮮艷嘅顏色。深藍、灰色、黑色嘅套裝或洋裝是最優先嘅選擇，當然唔好全身太過黑沉，咁樣會畀人過於保守、古板、嚴肅嘅感覺，適當咁配搭返白色T恤或者襯衫、咖啡色或大地色嘅西裝外套，相對地畀人一種舒適感，同時亦不失大雅！

2.Smart Casual v.s Formal Dress

面試前要仔細了解你要面試嗰間公司嘅文化同類型，如果係創意型、時尚型、新興媒體之類嘅公司，例如廣告公關、網媒，要求有個人特色、比較隨性嘅工作氣氛，咁就唔好著得過於正經啦，Smart Casual就已經好足夠啦！例如係襯衣配搭黑色長西褲、純色針織衫配鉛筆裙，達到整潔俐落、有自信就好足夠。但是如果你面試嘅公司係商務型、科技業、講究專業技術同知識型嘅，咁最好就選擇基本又保守嘅穿搭，畀人一個沉實、穩重、專業嘅感覺，呢個時候正裝就係必須啦！

3.見工著咩鞋先啱？

去見工切記唔好著涼鞋、拖鞋，畀人一種太隨便同唔尊重場合嘅感覺。而學生見實習工，最好都唔好著好花巧嘅高踭鞋，如需要著到正裝嘅時候，可以配搭裸色或黑色簡約嘅密頭高踭鞋，如果係Smart Casual的話，平底鞋或平實布鞋都可以！

4.頭髮應該點處理？

除非你見工嘅公司係行時尚路線，如果唔係的話，首先髮色最好係深色，若然係漂染過嘅顏色有機會畀人唔夠可靠嘅第一印象，坊間有唔少一次性嘅焗油染髮，呢個時候就可以大派用場啦。配返正裝，頭髮最好係扎起，畀人清爽、能幹嘅感覺，不過，除咗講究專業工作嘅公司外，見工髮型一般唛講夠整潔就可以啦。

5.不宜佩戴多於三件配飾單品

包括手錶在內，見工全身唔適宜配戴多詔三件配飾單品！女生如果有帶耳環嘅習慣，見工最好只帶基本簡單款式，唔好帶太過花巧、大件嘅耳環，另外耳骨等耳環見工時候都係除落嚟比較穩妥。至於手錶都好講究，唔好配戴太貴重嘅款式，始終學生要畀人簡樸、踏實嘅感覺，太過昂貴嘅手錶反而會引起反感。而手鏈、戒指、頸鏈等等最好都除低啦，總結而言！簡單就是美！