定期存款要留意！

定期存款聽落好似好遙遠仲未關自己事咁，但係好快當你哋畢業就要開始接觸到呢啲理財方式，所以都要依家留意多啲理財資訊呀！

定期存款低息儲蓄就大家都知，但係當中都有幾點要注意㗎喎🧐，知多啲就更加有助揀間啱自己嘅銀行啦👍🏻。

1. 新資金點定義？⭐

唔少銀行推出嘅定存優惠淨係限於新資金，但係都要小心每間銀行對「新資金」嘅定義喎，例如恒生銀行係指最新存款總結餘同30日前結餘做對比之後所增加嘅金額，但係南洋商業銀行嘅新資金就指唔包括透過該行本票或者其他帳戶存入嘅資金。假設係南洋戶口入面有10萬，只係要將資金調去B銀行，再將B銀行開10萬蚊嘅支票交去南商做定存，嗰筆款項就叫做新資金啦，成個過程都要幾日㗎。

2. 定存一定要到期先收到息？⭐

一般定存一定要喺合約到期日先可以獲派利息同拎返款項，但係現時市面上有啲中小型銀行為咗搶市場，推出一啲「月月派息」嘅定存優惠，例如大新銀行「悅出本息」定期存款推出每月派息同部份本金計劃。不過，月月派息嘅計劃市場入面選擇有限，如果對現金流唔太重視，可以揀返傳統型嘅定存計劃，可以拎到最佳回報。

3. 網上做定係落分行做？⭐

以前親身去銀行做定存有嘅利率優惠會比網上申請嘅高，但係近年有變，有銀行推出網上定存限定優惠，例如星展銀行推出過網上定存優惠，首次透過app開立10萬或以上，網上定存可以有600蚊現金獎賞，又有0.2%年利率嘅現金獎賞。又好似中銀香港「綜合理財服務」嘅個人客戶經網上銀行或者手機銀行用50,000蚊或者以上開立3或6個月「限時網上閃購定期團購優惠」，就可以拎到1.8%至2%嘅優惠，網上開戶優惠隨時比分行嘅仲要多。

4. 定存都要擇日？⭐

做定存都真係要擇日子㗎，因為好多銀行會推出生日禮遇，顧客只要係生日嘅月份內做定存，就可以有比同期利率再高啲嘅優惠。例如花旗銀行存入新資金同設立港元或者人民幣定期存款，再喺生日月份做定存就可以有額外0.2%嘅定期存款年利率。如果本身係中國建設銀行「貴賓晉裕」嘅客戶（理財總值要求為$500萬）呢，生日月份就可以有額外3.6%定期存款優惠利率，上限就係10萬。