成日聽窩輪高風險？到底咩係窩輪？

去投資股票，當然希望獲利，有唔少人都希望利用槓桿原理去達到以小見大嘅效果~而窩輪就係其中一個方法。

咩係窩輪？

窩輪最初出現，係由上市公司發行用黎嚟集資，或者回饋員工同股東。而窩輪其實係warrant嘅譯音，佢嘅中文名係認股證，係指一個「權利」，可以俾投資者喺指定嘅日期，用指定嘅行使價，買入或者沽出相關資產，而相關資產包括股票、指數、商品、貨幣、外國股票等等。雖然定義上係話買賣相關資產，實際上同打麻雀咁，只計輸贏。

窩輪中嘅認購證 (call輪)

認購證，係指擁有買入相關資產嘅權利，當相關資產價格上升時候，認購證價值理論上亦會相對上升，屬於睇好會升嘅投資工具，香港散戶會叫佢做「call輪」。

窩輪中嘅認沽證（put輪）

同認購證相反，認沽證就係擁有沽出相關資產嘅權利，當相關資產價格下跌，認沽證價值理論上反而會上升，屬於睇淡嘅投資工具，香港散戶會叫佢做「put輪」。

窩輪同牛熊證有乜分別？

對於唔少投資者黎講，窩輪高風險所以只有聽過，甚少會落身投資，除非十分熟悉經濟股票市場。牛熊證有收回價、行使價、實際槓桿、換股比率，到期日等條款，仲有個強制收回機制；而窩輪呢？同牛熊證一樣，都會有行使價、實際槓桿、換股比率，到期日等，但係就冇牛熊證嘅收回價，簡單啲黎講，牛熊證嘅風險係，如果正股唔跟妳預期方向走，當牛熊證觸及收回價水平時，牛熊證就會被強制收回，即係冇仇報，冇得鬥長命。而窩輪嘅價格則受引申波幅嘅影響。