足不出戶！3個幫你達成Home Office管理強積金大法

受疫情影響，好多人都情願留喺屋企，就算確診個案對比其他地方嚟講唔算多，香港人都唔應該鬆懈，要做好個人衛生同提高防護意識，減少外出先可以減少病毒喺社區擴散。再者，依家全球經濟因為疫情受挫，打工仔係時候考慮一下強積金嘅分配，做好準備應對股災~

1. 善用受託人嘅電子服務
現時所有受託人都有提供唔同嘅電子服務，無論喺處理時間或方便程度上，僱主僱員都能夠受惠。例如僱主可以透過唔同受託人提供嘅網上供款處理系統去計算僱員嘅強積金供款，更可以自動轉賬或以其他電子支付方式去繳交強積金供款，既準確又快捷。
至於強積金計劃成員亦可透過受託人嘅數碼服務查閱強積金帳戶資料，有啲仲提供虛擬助理解答查詢同網上更改強積金投資指示等服務。

2. 「個人賬戶電子查詢」平台查閱擁有嘅賬戶
另外，打工仔每次轉工，就會多一個強積金帳戶，他們可以趁喺屋企呢段時間整合自己嘅賬戶，透過積金局嘅「個人帳戶電子查詢」平台同埋流動應用程式可以免費查閱強積金個人帳戶報表，查閱自己嘅帳戶數目同相關受託人嘅聯絡方法，以方便整合同管理帳戶。
計劃成員透過網上遞交申請，只需提供身分證同最近三個月內發出嘅住址證明以核實身分，就可以即時啟動服務，既方便又簡單。

「強積金基金平台」比較投資表現
積金局嘅一站式「強積金基金平台」同埋流動應用程式，等打工仔可以輕易咁審視強積金基金嘅資訊，比較管理費以及投資表現，再配合受託人嘅電子服務，咁就可以因應個人情況輕鬆管理強積金啦。

留喺屋企，除咗煲劇、瞓教之外，都要為自己未來作打算，完成整合MPF，相信會好有滿足感！！