十大見工技巧！點解佢要咁問？
作為社會新鮮人👩🏻💼，無乜打工經驗，去面試見工自然會緊張啲，等我哋幫你預備下講咩去突出自己啦！我哋準備咗十條最常見嘅問題，詳細咁幫你分析埋點解面試官要咁問你同應對技巧。快啲係下面留言 “interview” ，我哋就會dm俾你㗎啦👍🏻！
💡請你自我介紹一下。
其實面試官都係想打開話題，睇下你嘅性格適唔適合個職位，亦都想知道你有無呢份工所需要嘅技術。咁你都應該分享下點解你適合呢份工。
預先準備一段自我介紹，內容應該包括你申請呢份工作嘅原因，同埋點解你係呢個職位嘅最佳人選，記得要用適當例子闡述。
💡你對我哋公司有咩認識？
面試官咁問其實都係想知道你對份工有幾認真，畢竟無人想浪費時間喺連功課都唔做下嘅人身上。如果你連公司嘅基本背景都答唔出，唔洗審人哋都知你無心做呢份工啦。
千其唔好睇小資料搜查呢一步，你要做嘅嘢包括了解公司歷史、最新動向，甚至係面試官嘅背景資料。呢方面Google同LinkedIn都會幫到大家。
嘗試將自己同公司拉上聯繫，大家應該要了解人哋公司嘅公司宗旨、願景，公司文化，公司營運、主要業務範疇，再把握機會表現出你同公司嘅想法同願景吻合，認同公司嘅方向。
💡點解你對呢個職位有興趣？
面試官想知嘅嘢好簡單，就係你有冇無正確理由去申請呢個職位 。面試官淨係會想聽到有意義嘅答案，佢哋想知道你有正確嘅抱負去申請呢份工。
表現出正確嘅動機，同埋你對呢份工或呢個行業嘅熱情，解釋你有幾適合呢份工，話俾人聽你想點樣發展自己嘅技能，同埋你可以點樣貢獻到啲咩公司。
💡你最大嘅優點係咩？
面試官咁問，係想知道你有幾了解自己嘅能力。更重要嘅係，佢想知你嘅長處對公司有咩作用。試下多啲舉例去解釋，但係記住千其唔好讚自己讚過火，適當地保持謙虛，留個好印象比人哋。
💡你最大嘅缺點係咩？
同上一條問題差唔多，面試官係想知道你對自身缺點有無自知之明。呢條問題嘅重點係你要表現出你有努力改善缺點。你嘅答案要話到俾人知，你有決心進步同埋面對挑戰。
記得揀一個職位容許嘅缺點。回答呢條問題嘅時候，有樣嘢要特別注意，千其唔好答一個嗰間公司無法接受嘅缺點。仲要解釋你有點樣努力改善，話俾人聽你會點樣克服你嘅缺點，記住要舉出實際例子去證明你點樣克服自己嘅缺點。
💡分享一下你喺工作上處理過嘅挑戰／衝突。
面試官想知道你點樣處理衝突，從而衡量你面對壓力時夠唔夠冷靜同克制，畢竟無公司會想請個遇到壓力就會崩潰同發嬲嘅人。
呢個係你留下深刻印象嘅好機會。除咗講解自己嘅經驗之外，大家可以試下請面試官提出一個情景俾你解決。例如，佢可能會同你講，有個客因為等咗食物好耐都未到而好嬲，你會點處理。你可以同面試官講，你會用一個叫STAR嘅方法處理，STAR係代表：
情景 (Situation)
職責 (Task)
行動 (Action)
成果 (Resolution)
💡你中意邊類工作環境？
面試官想知道你適唔適合公司嘅環境同文化，避免請咗個格格不入嘅員工。如果你證明到自己合適，亦都代表你有機會長期為公司服務。
首先，你有兩個辦法去了解間公司嘅文化，一係Google間公司，睇下佢哋網頁嘅「關於我們」，一係問下有冇相熟朋友喺間公司做緊。就係咁簡單。
試諗下你in緊間PR公司，你嘅工作將會好忙，可能要經常OT，亦都要成日周圍跑見好多人。當面試官問你呢條問題，你應該同佢講你好享受同唔同嘅人交流，亦好鍾意呢種工作環境，可以發揮自己最好嘅一面。
💡工作以外有咩興趣？
呢類問題算係比較私人嘅，主要目的都係了解你會點運用空閒時間，好多人可能會諗都唔諗就答。不過要小心啲，面試官會想知道你點樣有效運用時間。
比較一下自己嘅嗜好，衡量邊樣會容易啲聯繫到面試官或者間公司。大家可以分享啲有意義嘅興趣，例如做去動物領養中心做義工，或者去探訪老人院。如果你平時無做開義工，都唔緊要嘅，你可以分享下自己對攝影有興趣，又或者熱愛運動。分享一下點解你會中鍾意做呢啲嘢，只要解釋得好，同樣會加分。
💡你覺得我哋公司有咩需要進步／改善？
呢類問題通常都有啲刁鑽，面試官其實係想知道，你到底知唔知道公司做啲咩。
你有無具諗到有創意嘅方法去解決問題，你可唔可以提出有建設性嘅意見，並且俾到可行方案。
面試官想知道你分唔分辨到公司有咩做得好，有咩做得唔好，兼且可以點改善。答呢類問題，最重要係保持合理。千其唔好指出完問題又唔提出改善方案，呢個係面試大忌。相信大家都試過俾老師批評你份paper寫得唔好，但又唔講下可以點改進喎，你話係咪好黑人憎先？
第一步： 做足功課，第二步： 提出有建設性嘅意見，再強調你提出嘅方案點樣為公司帶來好處。
💡你有無問題想問？
好多人都會有個錯覺，覺得見工純粹係去答面試官問題，其實見工都同時俾咗機會你去提問。面試官咁問，其實係想了解你嘅性格，你對公司係咪真係有興趣，所以好好把握機會，準備定問題去問面試官！
你可以提出關於你個職位嘅問題：
點解會有呢個職位空缺？呢個係咪新職位？如果唔係，點解上一手會離職？
你哋打算請幾多個人擔任呢個職位？
你哋會用咩機制評估面試表現，大約幾時會收到正式答覆？
又或者，可以提問關於間公司嘅嘢：
公司來年有咩目標？
公司有無遇到咩挑戰？
你喺到做得開唔開心？
記住唔好錯過機會，要問埋人工同埋合約長短。
記住呢個問題係面試官最後一條問題，一定要好好表現自己，俾啲自信，你得嘅！