成為Zwaper之路

Yan – Marketing Executive [2 Years]

Hi~我叫Yan,典型文科人, DSE符符碌碌夠「33222」,叫做碌咗入U,做個「大學生」啦~之後唔知點解中學完全無文學底但又走咗去讀中文系嘅一個99年出世嘅女仔(仲要係非「八大」添)。初頭入U個時真係好雄心壯志,乜soc嘅活動都有報,被人問上唔上莊,之後又諗都唔諗就應承人,點知原來係「伏」黎嘅,搞到做嘢做到hihi咁,但係,就叫做識多咗好多朋友咁囉,被人嘅感覺就係叫做不論校內定校外都有好多fd嘅大yo狗…

唔經唔覺已經過完4年大學生涯,正所謂「大學五件事」:讀書、住hall、拍拖、上莊 同埋parttime,自問都真係做齊曬,得咗。話明part time,當然唔止一份架啦,我做過補習社、炒散、酒鋪……真係返過唔少種類嘅工,但當中又有分好多種嘅,有分純搵$類/「真.學嘢」類,前面舉嘅好明顯係一啲搵「快錢」工啦,但真係要講到學嘢嘅,Zwap尼份工一定係令我有最多得著嘅一份工喇

點解會入咗Zwap尼間公司嘅?

去到yr3,真係玩咗兩年,忽然有日醒覺:「嘩,原來我都yr3架喇?真係係時候要搵返啲『part time』做,如果唔係第時寫落CV先呀!」之後我就開始咗我嘅瘋狂搵工之旅喇~咁就不外乎係不停上網搵搵搵搵搵啦~啲乜野JobXX、Inxxxx、Moovxx都真係睇勻曬,最後我係睇到zwap個ig story話請pt之後就填咗份form嘅(其實都係以前上莊做sponsor task like落嘅page,真係諗都無諗過我會因為尼一個小小嘅like而改變咗我人生之後嘅發展方向!認真嘅!)

起初有人打比我,因為申請得太多份工,所以佢打黎個時我連佢係邊間公司都未知。如果大家有上網搵過工嘅都知,多數寫得Marketing / CS嘅工,好多時候上咗去就會變咗係保險公司黎嘅(我唔知係咪得我係咁啦),當我遇得尼啲事情多嘅時候,我開始變得連工都唔敢見,驚又係保險公司,驚去到曬我時間。所以每次有人問我仲係咪搵工嘅,我第一句就會問:「你到底係咩公司黎架?」

當電話對頭嘅人同我講係Zwap打黎嘅時候,其實我都仲係一頭霧水架,真到佢叫我去數碼港見工嘅時候,我就決定去試一試了,橫掂都住hall,同埋我咁大個女都未去過數碼港,咁不如去試下啦

初來乍到

其實數碼港真係好遠同好大,好記得我本身就約12點interview嘅,咁我都醒目11點半已經到咗數碼港,預早半個鐘搵路架喇,但最後都因為蕩失路嘅關係,搞12點3先上到公司,我仲要係打返比CS姐姐問路先至上到去。可能因為我係大西北牛牛出身嘅關係,個時嘅我真係未見過無掣嘅lift,所以淨係撘lift都搞咗我一大輪時間。

終於上到去公司喇,個到比我嘅第一個印象就係一個好光猛嘅office,直覺話我知,今次尼份工一定唔會係伏!然後就有兩個大佬出黎,好正常地咁去進行interview,當中嘅過程都多多少少都透露出尼間公司嘅工作氛圍應該係認真時認真,但都應該幾舒服嘅~當interview結束之後,我先驚覺原來頭先其中一位in我嘅interviewer竟然就係尼間公司嘅GM,真係失覺曬。不過,我就係係一個咁誤打誤撞嘅情況之下入咗Zwap尼間公司嘅~

職場新人

其實我就係一個好中意同人講野、溝通嘅人,就算係之前上莊都好,我都會揀EVP/PR位黎上;但相對黎講,我做文件嘅能力就會比較「差」(雖然中文系做文職野都唔會差得太誇張)尼份可以算係我第一份返嘅文職工作。

其實同唔同society或者 party溝通個時都還算稱得上做得心應手嘅,但係每當要去到做文件個位,我都會變到錯漏百出,搞到manager幫我執勁多手尾,佢要無嫌棄我不突止,仲教我好多有關marketing上面嘅野,真係好多謝佢呀!尼種種嘅經驗,我都真係有用心記住架!

商業市場變化萬千,一個轉身可能就已經被個市場淘汰,只有keep住update自己先係最好嘅方法。做得marketing,一定要跟得個市場好貼,要知道尼一刻大眾嘅需求到底係咩,先可以捉得住啲人嘅口味。聽落好似好簡單,但實際行出黎又其實好難,而且marketing所代表緊嘅,更係一間公司嘅形象,所以尤其是有關於一啲對外嘅野,正常都會比啲乳臭未乾嘅「大學生」去做嘅,更何況我地仲要只係part time?不過Zwap好放心比年青人去闖,比好大自由度我地,先可以令我地出到咁多唔同主題嘅post咋

時間話咁快就過,眨下眼就過完人生中最快樂嘅四年大學生涯,多謝Zwap請咗我,令我發掘到人生嘅另一條路,我宜家岩岩grad咗個幾月,都有幸收到Sales & Marketing工作嘅offer,都係多得Zwap呢份工可以令我好好裝備自己咋!

講咗咁多,其實我最希望嘅就係可以透過我嘅經歷,令你更加了解到Zwap到底係一間點樣嘅公司~咁…你宜家又知道未呀? 如果你都想係一個尊重年輕人,同埋樂於交流意見,一齊學習(同搵錢~)嘅環境,裝備好自己,就報名成為Zwaper一份子啦!